INARI – ANÁR – AANAAR – AANAR

Anár leat Suoma viidámus gielda ja dáppe hállet máŋggaid gielaid: suomagiela, davvisámegiela, anárašgiela ja nuortalašgiela. Rájá duohken leat Norga ja Ruošša ja Anár leage albma kultuvrraid deaivvadanbáiki. Gielda lea hui riikkaidgaskasaš, dasgo turismasuorgi fállá ollu bargosajiid. Maiddái boazodoallu ja eará luondduealáhusat leat dehálaš ealáhusat. Sámi oahpahusguovddáža váldodoaibmabáiki lea Anára girkosiiddas.

Anára gilli lea sámekultuvrra guovddášbáiki. Anáris leat Sámekulturguovddáš Sajos, gos leat Sámediggi ja Yle Sápmi. Sajos lea maid dáhpáhusdállu, kongreassaguovddáš ja čoahkkinbáiki. Anáris leat maiddái Sámemusea ja Davvi-Lappi luondduguovddáš SIIDA ja Sámi oahpahusguovddáš, mat lágidit máŋggaid iešguđetlágan miellagiddevaš dáhpáhusaid. Ja de gilis lea vel PaPaNa-Bar, mii lea somás deaivvadanbáiki ja doppe čuojahit, lávlot ja ráppejit beakkán artisttat. Anáris don gávnnat buot maid don dárbbašat.

Anárjávri lea okta Suoma stuorámus jávrriin ja Anára girkosiida lea dan gáttis. Anáris leat earenomáš buorit vejolašvuođat johtit meahcis ja guovllus gávdnojit maid ollu merkejuvvon bálgát. Leammi álbmotmeahccige lea duos lahka. Jos fas liikot čierastallat, de gánneha dollet Suoločielgái. Anáris leat gávcci albma jagiáiggi. Go oahput álget, de lea vuos ruški ja de boahtá skábma. Ođđajagimánus beaivváš fas badjána, ja giđđadálvve lea hui fiinnis leat Anárjávrri alde. Ja de geassu ja boahtáge juo ijahis idja ja geasi maŋŋá fas Ijahis Idja.