STUDEANTTAT MUITALIT…

…Filbmasuorggis studeren lei mearkkašahtti ášši mu bargobálgá alde. Ožžon buori álggu bargat filbma- ja mediasuorggi ámmátolmmožin. Seammás bessen leat iežan olbmuiguin, iežan kultuvrrain ja gielain. Davviguovlu dagai mus riikkaidgaskasaš olbmo, ja dán áigge leange sihke máddin ja davvin. Mu mielas dat, ahte sámekultuvrra lei nu guovddážis oahpuid áigge, veahkehii mu gávdnat iežan jiena eamiálbmotfilbmadahkkin. Sámi geahččanguovlu leamaš maid ovdamunnin go lean bargan Suoma filbma- ja mediasuorggis.

– Suvi West

 

…Sámi oahpahusguovddáža medialinnjá rabai munnje uvssa filmmaid máilbmái. Ožžon movtta bargat iežan prošeavttaiguin ja skuvlaoappáin ja -vieljain ožžon buriid bargoskihpáriid. Lean bargan dan maŋŋá mediasuorggis ja festiválain ja dál áiddo báliid leanadáiddárin ovddideamen filbmasuorggi. Skuvlejumis leamaš stuorra mearkkašupmi mu bargui. Filmmat leat mu miela miel ášši.

– Anne-Kirste Aikio

 

…Studerejin medialinnjás 12.8.2009-3.6.2011 ja čađahin audiovisuála kommunikašuvnna ámmátdutkosa 2013 buriid árvosániiguin. Oahpuin lei stuorra mearkkašupmi, dasgo ledjen juo jagi 1999 rájes bargan rádiosuorggis ja dál ožžon iežan barggu váráš maid báhpáriid. Mediasuorgi ovdánii juo jagi -99 rájes issorasat. Rádio bealde dárbbašedje olbmuid geat máhttet dien ja dán. Deaddu sisdoalu buvttadeapmái sihke rádio ja tv bealde lei garas. Galggai doaibmat johtilit amas govssáhallat. Dušše rádio ii leat doarvái. Munnje rahpasii maid vejolašvuohta maid mediasuorgi skuvlejupmái Sámi oahpahusguovddážis. Lean dárbbašan dieđuid ja dáidduid go lean bagadallan ja čuohppan filmmaid ja go lean leamaš doaimmaheaddjin tv ja rádio bealde. Maiddái animašuvdnadáiddut ja giehtačállosiid čállin leamaš ávkkálaččat. Buot dát gullet skuvlejupmái.

– Irene Länsman

 

…Medialinnjás buollái hállu govvet ja bargat mediasuorggis. Oahpásmuvven iešguđetlágan kameraide ja editerenprográmmaide ja dat leat veahkehan dasa, ahte lea ain hui beroštuvvan oahppat ođđa govventeknihka ja buot earáge. Medialinjá maŋŋá lean beassan bargat iešguđetlágan bargguid Sámis. Dalán go gergen skuvllas bessen nubbin kamerabargin tv-prográmmii. Dan maŋŋá lean bargan ee. Unna Junná, somevideoid ja ođassáddagiid Yle Sámis. Medialinjá oahpuid maŋŋá lean oahppan leat maid roahkkat ja váldit vuostá fállojuvvon bargguid vaikko álo in leatge sihkkar birgengo. Munhan in ovdal medialinnjá diehtán maidige mediabargguin dahje in lean astoáiggisge bargan maidige mii dasa laktásii. Nu ahte gal doppe oaččui buori vuođu bargat dáid bargguid.

– Jonne Järvinen

 

…Vaikke (dahje daningo) lean sáiva helssetlaš, de háliidin boahtit namalassii Sámi oahpahusguovddážii oahppat mediasisdoalu buvttadeami. Mediasuorgi laktása juohke áššái ja leange dáppe oahppan ollu dakkára, mii lea ávkin maid boahttevuođas. Dáppe ohppen maid davviguovllu birra ja sámiid kultuvrras, ja dat lea munnje hui dehálaš. Buoremus ášši oahpuid áigge leamaš oktasaš prošeavttat, maid lean bargan ovttas báikkálaš olbmuiguin ja organisašuvnnaiguin. Oahpuid áigge beassá oahppat bargamiin ja dat leamaš munnje ođđa ášši. Gaskkohagaid vástu beanta suorggahii, muhto oahpaheaddjit ja skuvlaoappát ja -vieljat leat dorjon ja veahkehan, ja nu olmmoš birge. Lean loaktán Anáris bures – vaikko lea gal viehka lossat ja váivi sihkkelastit -30 gráđa buollašis.

– Eveliina (medialinja 2017-18)